O Celta Fortuna perdeu este sábado no seu duelo ante a SD Ponferradina (2-1). Dominar e ver portería non foi suficiente para que os celestes sumasen puntos na súa visita ao Toralín.
Os de Fredi Álvarez comezaron o partido impoñendo o seu estilo de xogo. Na primeira metade, foron claramente superiores, controlando o balón e chegando con perigo á área rival. Con todo, a falta de acerto nos últimos metros evitou que se adiantasen no marcador antes da saída a vestiarios.
Na continuación, a Ponferradina golpeou primeiro. O exceltico, Borja Valle, sorprendeu a Marc Vidal e rompeu a igualdade no minuto 62. Pese ao mazazo, o Fortuna non baixou os brazos e no 88 chegou a recompensa. Gael Alonso marcou o tanto do empate ao desviar co tacón un centro medido de Miguel Román. O gol pareceu devolver a esperanza aos Fredi, pero o fútbol ten os seus propios guións, e no último minuto do tempo engadido, os locais lanzaron un centro lateral que terminou no fondo da rede celeste, sentenciando o partido e deixando ao filial sen premio.
Agora, o equipo céntrase no seu próximo compromiso, que terá lugar o domingo 13 outubro ás 17:30h. Os celestes recibirán en Abanca Balaídos ao SD Amorebieta coa esperanza de converter o seu bo xogo en puntos.
