“…que lástima pero adiós, me despido de ti y me voy…”
A nosa querida Bancada de Gol despediuse cun sorriso ante os centos de corazóns celtistas que acolleu ao longo da súa historia e vendo como o RC Celta facíase novamente cos tres puntos en Abanca Balaídos.
A xornada arrincaba con Iago Aspas recollendo o seu noveno premio Manuel de Castro Hándicap a mellor xogador do ano 2024, un recoñecemento ao seu incrible rendemento que recibía da man de Álex López quen, pouco despois, era tamén homenaxeado por todo o celtismo.
Co contador en marcha, o RC Celta comezaba o partido con dificultades, incapaz de atopar as boas sensacións, mentres que o conxunto navarro xogaba con intensidade e demostraba un sistema defensivo co que rapidamente se facía coa posesión do balón. Un despregamento físico notable co que Osasuna estivo a piques de poñerse por diante no marcador aproveitando a falta de resposta local. Con todo, o conxunto de Claudio Giráldez foi atopando aos poucos a súa identidade e resistiu os envites rojillos. O Celta comezou a crecer a medida que avanzaba a primeira metade, con Fer López e Ilaix Moriba como os principais creadores de perigo. Un perigo en ataque ao que se sumaron Óscar Mingueza e Williot Swedberg que tentaron o gol ao fío do descanso, sen éxito.
Co arranque da segunda parte, o conxunto celeste saíu con outra mentalidade, máis agresivo e coa determinación de facerse cos tres puntos. Poucos minutos despois, Sergio Carreira facía suspirar a todo Abanca Balaídos cun remate desde fóra da área que Sergio Herrera lograba desviar cun voo espectacular. Tentábao o Celta que tería que esperar ata o minuto 65 cando, nunha xogada pola banda, Borja Iglesias recibía o balón na área pequena onde era derrubado por Lucas Torró. Unha acción que o árbitro non dubidou en sinalar como penalti, e nese preciso momento, todo pareceu deterse. Tan só permanecía o balón, a 11 metros da rede, e un Iago Aspas, recentemente entrado ao terreo de xogo, coa clara convicción de converter esa oportunidade en ouro. E o capitán non fallou. Coa súa habitual frialdade e cun tiro axustado ao pau, bateu a Sergio Herrera para poñer ao Celta por diante no marcador e desatar a euforia novamente no fortín celeste.
Co 1-0 ao seu favor, os de Claudio Giráldez demostraron a súa solidez defensiva ante un Osasuna que tentaba reaccionar cambiando o seu sistema e envorcándose en ataque. Pero o Celta resistiu e logrou pechar o partido cunha enorme dose de sacrificio e sumando outros valiosísimos 3 puntos que sitúan ao conxunto celeste na novena posición da clasificación.
Broche de ouro para o último baile xunto á Bancada de Gol que pon punto e final á súa historia, unha historia pola que pasaron centos de xeracións de celtistas, unha historia sinónimo de paixón, de afouteza e de corazón. Bancada de Gol despídese pero a súa esencia e o sentimento que alberga sempre permanecerá en cada un de nós.
Grazas, Gol!
FICHA TÉCNICA:
1 – RC Celta: Vicente Guaita; Javi Rodríguez, Carl Starfelt, Marcos Alonso; Óscar Mingueza (Jailson, min.84), Hugo Sotelo (Fran Beltrán, min.77), Ilaix Moriba, Sergio Carreira; Fer López (Iago Aspas, min.64), Williot Swedberg (Iker Losada, min.84) e Borja Iglesias (Pablo Durán, min.77).
0 – CA Osasuna: Sergio Herrera; Rubén Peña, Catena (Rubén García, min.72), Boyomo, Herrando, Abel Bretones (Arnaiz, min.84); Moncayola (Iker, min.84), Torró, Moi Gómez (Barja, min.80); Budimir e Bryan Zaragoza (Raúl, min.80).
Goles: 1-0 Iago Aspas (p), min. 67.
Árbitro: José María Sánchez Martínez (comité murciano). Mostrou cartón amarelo a Fer López no minuto 38.
Incidencias: Partido correspondente á xornada 25 de LALIGA EA SPORTS disputado no estadio Abanca Balaídos ante 22.005 espectadores. Nos minutos previos do partido, o capitán celeste, Iago Aspas, recibiu o premio Manuel de Castro Hándicap como mellor xogador do Celta en 2024. Por outra banda, o exxogador, Álex López, era homenaxeado por todo o celtismo.
