O Celta caeu por 2-4 ante o FC Barcelona nun partido intenso e con alternativas disputado en Abanca Balaídos. Os celestes competiron ben durante boa parte do encontro, pero a eficacia ofensiva dos blaugranas, liderados por un inspirado Robert Lewandowski, acabou decidindo o resultado.
Tras unha homenaxe a Fran Beltrán polos seus máis de 236 partidos como celeste, o encontro comezou con moito ritmo. Lewandowski adiantou ao Barça desde o punto de penalti no minuto 10, pero Sergio Carreira empatou axiña para o Celta cunha boa acción colectiva. O dianteiro polaco volveu marcar no 37 e Borja Iglesias asinou o 2-2 pouco despois, reflexo da ambición do conxunto vigués. Porén, antes do descanso, Lamine Yamal aproveitou un desaxuste defensivo para anotar o 2-3.
Na segunda metade, o Barcelona controlou mellor o xogo e o físico empezou a pasar factura aos celestes. Lewandowski completou o seu triplete no minuto 73 tras un saque de recanto executado por Rashford, sentenzando o 2-4 definitivo. Os de Claudio Giráldez buscaron recortar distancias ata o final, pero sen éxito ante un rival máis preciso nos metros finais.
A pesar do marcador, o Celta deixou boas sensacións en varios tramos do encontro e mantivo a súa identidade competitiva fronte a un dos grandes da LaLiga. Agora chega unha semana de parón que servirá para recuperar forzas e axustar detalles antes de visitar o Deportivo Alavés na próxima xornada, onde o equipo celeste buscará reencontrarse coa vitoria.
FICHA TÉCNICA:
2 – Celta: Radu; Manu Fernández (Miguel Román, min.78), Starfelt, Marcos Alonso; Sergio Carreira, Hugo Sotelo (El-Abdellaoui, min.78), Ilaix Moriba, Óscar Mingueza (Javi Rodríguez, descanso), Pablo Durán, Borja Iglesias (Iago Aspas, min.70) e Ferran Jutglá (Bryan Zaragoza, min.58).
4 – Barcelona: Szczesny; Eric García, Cubarsí, Araujo, Balde (Gerard Martín, min.86); Dani Olmo (Christensen, min.86), Frenkie de Jong, Fermín, Lamine Yamal (Bernal, min.97), Rashford (Ferran, min.88) e Lewandowski.
Goles: 0 – 1, min.10: Lewandowski, de penalti; 1 – 1, min.11: Sergio Carreira; 1 – 2, min.37: Lewandowski; 2 – 2, min.43: Borja Iglesias; 2 – 3, min.45+4: Lamine Yamal; 2 – 4, min.73: Lewandowski.
Árbitro: Alberola Rojas. Expulsou a De Jong (min.94) por segundo cartón amarelo. Amonestou a Miguel Román (min.89) por parte do Celta e a Cubarsí (min.42), Rashford (min.87) e Lewandowski (min.88) por parte do Barça.
Incidencias: Partido correspondente á Xornada 12 de LALIGA EA SPORTS disputado no estadio de Abanca Balaídos ante 21.887 espectadores.
