O Celta e o Wolverhampton Wanderers FC alcanzaron un acordo para a cesión de Fer López ata final de tempada. O dianteiro volve así a Vigo para reforzar ao conxunto celeste nesta segunda volta da competición ligueira e afrontar o ilusionante reto europeo tras a recente clasificación para os dezaseisavos de final da Europa League.
Formado na Madroa desde os nove anos, Fer López regresa á que sempre foi a súa casa despois de iniciar unha nova etapa no fútbol inglés. No seu paso polos Wolves, o canteirán disputou un total de 12 partidos oficiais, sumando unha asistencia e acumulando experiencia nunha das ligas máis esixentes do panorama internacional.
O atacante poñerase agora novamente ás ordes de Claudio Giráldez e reincorpórase a un equipo ao que coñece á perfección e no que xa demostrou a súa capacidade competitiva. Antes da súa saída á Premier League, Fer López foi unha das pezas destacadas do Celta Fortuna, o que lle permitiu dar o salto ao primeiro equipo, debutando tanto na Copa do Rey como en LaLiga, onde chegou a disputar 17 encontros e anotar dous goles.
O seu regreso supón un reforzo importante para o plantel nun momento clave da tempada e, ao mesmo tempo, o retorno dun futbolista identificado tanto cos valores e filosofía do club como coa súa canteira e afección.
O Celta dá a benvida a Fer López e deséxalle o maior dos éxitos nesta nova etapa defendendo o escudo celeste.
Benvido, Fer!
