As Escolas de Fútbol Celta continúan reforzando a súa aposta formativa desde idades moi temperás, promovendo a práctica deportiva entre os máis pequenos e transmitíndolles, ao mesmo tempo, o sentimento e o orgullo de pertencer ao Celta.
Este fin de semana, A Madroa converteuse nun pequeno gran estadio cheo de ilusión. Alí reuníronse nenos e nenas da nosa escola de Iniciación – Miudiños, tanto da sede de A Madroa como da de Coia, para gozar dunha xornada de partidos amigables xunto a outros pequenos futbolistas da cidade, nesta ocasión procedentes de Candeán e do Rápido de Pereiró. En total, 40 nenos e nenas de entre 4 e 5 anos viviron as súas primeiras experiencias competitivas, acompañados por unha gran cantidade de familiares que vibraron coas súas xogadas, o seu entusiasmo e os seus progresos co balón.
O obxectivo destas xornadas é que os máis pequenos melloren as súas capacidades, aprendan a compartir o xogo e, por riba de todo, se divirtan practicando o seu deporte favorito. Porque no Celta cremos que o fútbol nace da ilusión, e esa ilusión é a que queremos cultivar desde o primeiro día.
