O Celta alcanzou un acordo para ampliar o contrato de Cristian Carro, que a próxima tempada formará parte do Celta Fortuna. O atacante do Xuvenil A amplía a súa vinculación cun contrato 2+2 e dará o salto ao filial celeste a partir do próximo curso.
Carro, que destaca pola súa velocidade, capacidade de desborde e determinación no último terzo, disputou un total de 15 encontros esta tempada ás ordes de Alberto Suárez entre a División de Honra e a Copa do Rey xuvenil. O conxunto celeste é segundo na División de Honra con 51 puntos e logrou clasificarse para a Final Four da Copa do Rey. En semifinais medirase ao Real Betis o vindeiro mércores, 11 de marzo ás 18:30 horas, no Estadio Anxo Carro.
Cristian chegou ao club no verán de 2022, procedente do Ural Español, en idade de cadete. Desde entón, a súa evolución foi constante ata chegar a debutar co Celta Fortuna co que xa participou nun total de 4 encontros, ademais de realizar a pretemporada o pasado verán co filial.
Agora, o extremo dá un paso máis na súa carreira deportiva e seguirá crecendo co escudo celeste no peito.
Parabéns, Cristian!
