O Celta Fortuna comezou as semifinais do playoff de ascenso cun empate (1-1) ante o CE Europa en Can Dragó. Os locais adiantáronse antes do descanso, pero Antañón apareceu no tempo engadido para igualar o encontro e deixar todo aberto de cara á volta en Abanca Balaídos.
A eliminatoria arrincou coa intensidade propia das grandes citas. O Fortuna competiu con personalidade ante un rival sólido, nun primeiro tempo moi disputado e con poucas concesións. Porén, foron os locais os que atoparon premio pouco antes do descanso cun gol de Jordi Cano, que obrigou aos de Fredi Álvarez a remar contracorrente durante a segunda metade.
Lonxe de dar un paso atrás, o filial celeste regresou dos vestiarios decidido a cambiar o rumbo do encontro. Con paciencia, carácter e ambición, foi medrando co paso dos minutos, gañando terreo e achegándose cada vez máis á área rival. E foi entón cando chegou o momento de Antañón. Nese territorio que tantas alegrías lle deu ao Fortuna durante o curso, o desconto, o atacante apareceu para asinar o empate. Un gol que premiou a insistencia celeste e que deixa a eliminatoria completamente aberta.
O Fortuna xogará o próximo domingo o pase á final do playoff e o club fai un chamamento a todo o celtismo para que acuda ao templo celeste a arroupar ao filial nun encontro decisivo.
FICHA TÉCNICA:
1 – CE Europa: Juan Flere; Arnau Campeny, Marcel Sgro, Óscar Vacas, Toni Caravaca (Francisco González, min. 82); Meshak Babanzila (Alexandre Pla, min. 90), Josu Gallastegi (Álex Cano, min. 46), Fran Gil, Adnane Ghailan; Jordi Cano (Khalid Noureddine, min. 90) e Alejandro Jay.
1 – Celta Fortuna: Coke Carrillo; Quique Ribes, Pablo Meixús, Anxo Rodríguez; Hugo Burcio (Pablo Gavián, min. 89), Adrià Capdevila (Andrés Antañón, min. 46), Joel López, Germain Miller (David Dela, min. 89); Hugo González, Álvaro Marín (Bernard Somuah, min. 46) e Óscar Marcos (Aldrine Kibet, min. 70).
Goles: 1-0, min. 44: Jordi Cano. 1-1, min. 90+8: Andrés Antañón.
Árbitro: Juan Manuel Gordillo Escamilla (Comité valenciano). Amonestou a Aldrine Kibet (min. 71) por parte do Celta Fortuna, e a Josu Gallastegi (min. 40), Fran Gil (min. 77) e Adnane Ghailan (min. 90) por parte do CE Europa.
Incidencias: Encontro correspondente á ida das semifinais do playoff de ascenso á LaLiga Hypermotion da Primeira Federación, disputado no Estadio Can Dragó.
