ABANCA Balaídos acolleu os días 5 e 6 de outubro a primeira edición das Xornadas Nacionais de Xornalismo e Deporte, organizadas pola Asociación Galega de Xornalistas do Deporte (AGAXORDE). Durante dúas xornadas, o estadio do Celta reuniu representantes do mundo do deporte, o xornalismo, as institucións e a xestión deportiva.
O programa comezou cunha homenaxe aos olímpicos galegos, que contou coa participación de Ricardo Leiva Román, director de Deportes do Comité Olímpico Español, e continuou coa mesa «A importancia dun club profesional como o Celta para unha cidade como Vigo», con Abel Caballero, alcalde de Vigo; Javier Tebas, presidente de LaLiga, e Marián Mouriño, presidenta do Celta. A xornada completouse cun debate sobre as mulleres no xornalismo deportivo, con Cristina Cubero, Ana Guantes, Mercedes Moralejo e Lucía Dávila, moderado por Mila Alonso.
A segunda xornada abordou diferentes cuestións relacionadas co deporte profesional. A mesa sobre turismo deportivo contou con Manel Fernández, concelleiro de Deportes de Vigo; Carlos Cao, director de Infraestruturas e Relacións Institucionais do Celta; David Suárez Martínez, CEO de Diesemm, e un representante de Galitur, con Terio Carrera como moderador.
A continuación, Luis García, xornalista de Cuatro e COPE; Richard Barral, presidente da Asociación Española de Directores Deportivos; Miguel Méndez, seleccionador español feminino de baloncesto, e José Carlos Bastos, xefe de prensa do Celta, participaron na mesa sobre a relación entre os medios de comunicación e o deporte profesional, moderada por Armando Álvarez.
O programa incluíu tamén unha sesión sobre prevención da violencia no deporte base, a cargo de Beatriz Gelpi Ferreira, mestra en Formación Permanente en Dereito Deportivo pola Universidade de Valencia e cofundadora de Juntos Invulnerables.
As xornadas finalizaron con «O gran momento do Celta», unha conversa con Claudio Giráldez, adestrador do primeiro equipo; Iago Aspas, capitán do Celta; Fredi Álvarez, adestrador do Fortuna, e Pablo Meixús, capitán do filial, moderada por Víctor López e coa intervención de exxogadores por videoconferencia.
Ao evento asistiron tamén varios representantes do Club Celta Empresas, que acompañaron estas xornadas celebradas nas instalacións de ABANCA Balaídos. A celebración deste tipo de eventos esperta o interese das empresas que colaboran co club e permite ademais mostrar as posibilidades de ABANCA Balaídos como espazo para acoller actividades profesionais máis alá dos días de partido.
