Facía oito anos que a categoría de prata do fútbol español non vivía un duelo de filial e o Celta Fortuna aproveitou a ocasión para que a festa se quedase na casa. O conxunto de Fredi Álvarez asinou un contundente 4-1 ante a Real Sociedade B en Abanca Balaídos, demostrando unha madurez competitiva que os fai sentir cada vez máis cómodos na Segunda División.
O filial celeste saltou ao terreo de xogo disposto a levar a iniciativa e, cunha boa circulación do balón, atopou pronto o premio. Ángel Arcos estreou a súa conta goleadora cun impecable lanzamento de falta desde fóra da área. O canteirán puxo a guinda ao seu magnífico arranque de tempada e, desde o carril esquerdo, converteuse nunha ameaza constante para a defensa donostiarra.
Álvaro Marín tomou o relevo con dous goles antes do descanso. Primeiro, desde o punto de penalti; despois, culminando unha gran acción ofensiva na que volveu demostrar o seu instinto goleador. O seu dobrete non só deixou o partido encarrilado, senón que o sitúa como pichichi da Segunda División. Case nada.
Co 3-0, o Fortuna non levantou o pé do acelerador, mantivo o ritmo e seguiu buscando a portería rival. O cuarto chegaría nunha magnífica xogada colectiva entre Kibet, Ángel Arcos e Óscar Marcos que o atacante keniano culminou cun remate directo ao fondo da rede. A Real Sociedade B tratou de maquillar o resultado no tramo final, pero non puxo en dúbida o dominio do talento Feito na Madroa.
Deste xeito o Celta Fortuna volve á senda da vitoria coa mirada posta xa no seu próximo encontro que será ante o CD Tenerife o luns, 19 de outubro ás 20:30h., en Abanca Balaídos.
FICHA TÉCNICA:
4 – Celta Fortuna: Coke Carrillo; Alexis Olmedo (Seyni Ndiaye, min. 46), Quique Ribes, Joel López (Germain Milla, min. 46); Pablo Gavián, Adrià Capdevila (Ángel Davila, min. 78), Mateo Sobral, Ángel Arcos (Jan Oliveras, min. 66); Kibet, Álvaro Marín e Óscar Marcos (Hugo Cuenca, min. 74).
1 – Real Sociedad B: Fraga, Balda, Kita, Lebarbier (Ibai, min. 60), Díaz (Andrews, min. 74), Carbonell, Calderón, Gorosabel, Astiazarán, Osazuwa (Soroeta, min. 60) e Rupérez (Garro, min. 60).
Goles: 1-0, min. 11: Ángel Arcos. 2-0, min. 31: Álvaro Marín. 3-0, min. 35: Álvaro Marín. 4-0, min. 58: Kibet. 4-1, min. 86: Balda.
Árbitro: Juan Manuel Gordillo (Comité Valenciano). Por parte do Celta Fortuna amoestou a Alexis Olmedo, Quique Ribes, Joel López e Óscar Marcos. Mentres que, por parte da Real Sociedade, viu cartolina amarela Balda.
Incidencias: Partido correspondente á novena xornada de LaLiga Hypermotion disputado en Abanca Balaídos ante 4.005 espectadores. Os xogadores do Celta Fortuna saltaron ao campo cunhas camisetas cunha mensaxe de apoio a Bernard Somuah, recentemente operado dunha lesión que o manterá afastado dos terreos de xogo ao redor de 4 meses.
