O novo extremo zurdo celeste foi presentado hoxe no Estadio de Balaídos
Balaídos acolleu hoxe a presentación de Théo Bongonda (Bélxica, 1995), novo atacante celeste que asina polo club vigués até xuño de 2019. Bongonda, internacional Sub-21 coa selección belga, recibiu a benvida da conselleira Carmen Avendaño en representación do Consello de Administración céltico, mentres que o director deportivo Miguel Torrecilla facilitou detalles sobre as características e expectativas deste prometedor futbolista.
“A contratación de Bongonda débese a buscar a un xogador específico de banda esquerda. Está capacitado para desbordar, con moita velocidade. Ten un gran futuro por diante e pode dotar ao equipo dunha maior fortaleza ofensiva. A súa marxe de mellora é enorme”, explicou Torrecilla.
“Despois da chuvia vén o bo tempo. Imos remontar esta situación”
“É unha gran honra vir ao Celta”, declarou Bongonda. O mozo dianteiro, que asistiu ao encontro do Celta ante a Valencia, destacou que “ao equipo gústalle xogar co balón. Creo que hai cousas moi boas que podo achegar”. Bongonda tamén quixo agradecer ao vestiario a maneira en que lle acolleron: “Son moi bos xogadores e teño moito que aprender deles”.
“Despois da chuvia vén o bo tempo”, declarou o xa xogador céltico preguntado polo refacho de resultados do Celta nas últimas xornadas: “No club do que veño tamén estabamos a pasar un mal momento. Imos remontar esta situación”.
Théo Bongonda, que levará o dorsal 18, forma parte da expedición do primeiro equipo para os partidos ante Athletic Club (Copa do Rei) e Espanyol (Liga), polo que podería debutar có Celta esta mesma semana.
