José Naranjo xa é xogador do RC Celta. O prometedor atacante andaluz, celeste os próximos cinco anos, presentouse esta mañá en Balaídos como primeira fichaxe celeste para a tempada 2016/17. Naranjo mostrouse moi feliz pola súa incorporación ao club vigués e asegurou que chega a Vigo “para pelexar por ser titular”.
O dianteiro estivo acompañado polo conselleiro Antonio Rosendo e o director deportivo Felipe Miñambres. Rosendo deu a benvida ao futbolista en nome do club e agradeceulle apostar polo proxecto céltico. Pola súa banda, Miñambres destacou o seu talento, polivalencia e a espectacular tempada que acaba de asinar co Nástic de Tarragona.
Tras a rolda de prensa, realizada no céspede de Balaídos e á que puideron asistir os afeccionados, Naranjo vestiuse de celeste por primeira vez, regalou balóns asinados aos espectadores, asinou autógrafos e fotografouse cos celtistas.
