O RC Celta presentou este venres en Balaídos ao seu terceiro reforzo para a tempada 2016/17, o internacional arxentino Facundo Roncaglia. O defensa vestiu por primeira vez o equipamento celeste ante centos de celtistas que acudiron ao estadio vigués para darlle a benvida: “Estou moi contento de chegar aquí e espero estar á altura do Celta”, asegurou o xogador nas súas primeiras palabras como futbolista do Celta.
Roncaglia estivo acompañado no acto polo conselleiro Primitivo Ferro, quen deu a benvida ao futbolista en nome do club e encomiou as súas calidades e a súa dilatada experiencia en clubs de primeiro nivel. Pola súa banda, o arxentino expresou: “seguín ao Celta a pasada tempada e atraeume a súa forma de xogar”
Tras a rolda de prensa Roncaglia fotografouse cun numeroso grupo de nenos e nenas dos Campus da Fundación Celta, repartiu balóns asinados entre os afeccionados e achegouse á bancada para asinarlles autógrafos e sacarse fotografías con eles.
