Coa mente posta en lograr o tres puntos e alcanzar a primeira posición do grupo, o Celta recibe hoxe (19:00h) en Balaídos ao Ajax, un histórico do fútbol europeo que chega a Vigo tras gañar os seus dous primeiros partidos na fase de grupos da UEFA Europa League contra o Panathinaikos (1-2) e o Standard de Lieja (1-0).
Volver gañar
O Celta, tras encadear catro triunfos ante Sporting, Espanyol, Panathinaikos e FC Barcelona, buscará resarcirse do partido do domingo ante o Vilarreal e repetir a vitoria lograda no único precedente fronte ao equipo holandés en Balaídos, disputado na UEFA Champions League 2003/2004, para afrontar a visita ao Amsterdam Area do próximo 3 de novembro como líder de grupo.
Pero conseguir o triunfo en Vigo e lograr a segunda vitoria como local na competición europea non será fácil. O Ajax sumou este domingo a súa sétima vitoria consecutiva na liga holandesa tras derrotar ao ADO Dean Haag por 0-2, con goles de Davy Klaassen e Bertrand Traoré, manténdose como segundo clasificado na Eredivisie por detrás do Feyenoord, líder sólido tras non deixar escapar ningún punto en nove partidos.
O equipo de Peter Bosz buscará continuar este refacho e afianzar o seu bo comezo de tempada, podendo aumentar a vantaxe sobre o Celta a cinco puntos. O técnico holandés ha decidido viaxar a Vigo con 19 xogadores, e a pesar das ausencias de Lasse Schöne e Kenny Tete, Bosz considera que “o equipo atópase nun estado excelente e preparado para afrontar o partido”.
Pola súa banda, o adestrador celeste recupera a Pablo Hernández e a John Guidetti, pero non poderá contar con Marcelo Díaz e Beauvue por lesión. Por decisión técnica, quedan fóra da convocatoria Iago Aspas, Hugo Mallo, Bongonda, Naranjo e Cabral, polo que o preparador arxentino disporá de 18 xogadores para enfrontarse ao Ajax: Sergio, Fontás, Costas, Radoja, Pablo Hernández, Guidetti, Sisto, Rubén Branco, Orellana, Lemos, Wass, Jonny, Sergi Gómez, Planas, Señé, Roncaglia, Rossi e Pape Cheikh.
Os de Berizzo contarán co apoio de Balaídos para afrontar este encontro cun único obxectivo: lograr os 3 puntos e situarse no máis alto da clasificación.
