Este xoves 16 de decembro tivo lugar un emotivo acto en Abanca Balaídos no que o presidente, Carlos Mouriño, o responsable da área de Fútbol Denominación de Orixe Celta, Carlos Hugo García, o canteirán e excapitán, Borja Oubiña, e o canteirán e capitán do primeiro equipo, Iago Aspas, dirixíronse a todos os xogadores das categorías inferiores do RC Celta coa proximidade destas datas tan sinaladas.
Ademais, os catro capitáns do primeiro equipo -Hugo Mallo, Iago Aspas, Rubén Blanco e Brais Méndez-, todos eles canteiráns e co sentimento celtista por bandeira, fixeron entrega a cada un dos capitáns dos equipos da canteira, así como do Fundación Celta Integra, dos brazaletes que con tanto orgullo e tesón defenden os nosos xogadores no terreo de xogo.
Un acto moi sentido no que os nosos capitáns do primeiro equipo simbolizan o orgullo que supoñen para todos os xogadores do club, exemplos a seguir dentro e fóra do terreo de xogo e, que sen dúbida, representan o significado da palabra afouteza.
