Desde este mércores 29 de decembro, os afeccionados do RC Celta poderán adquirir merchandising e produtos do club celeste e outros 12 de LaLiga Santander a través de Amazon. Grazas a unha nova colaboración entre a liga de fútbol española e Amazon, haberá unha tenda dedicada a LaLiga dispoñible en Amazon.uk, Amazon.it, Amazon.fr e Amazon.de.
Nun primeiro momento, esta experiencia estará dispoñible en Reino Unido, Italia, Francia e Alemaña, e está previsto que se amplíe a outras rexións ao longo de 2022.
LaLiga Store inclúe máis de 1.600 produtos diferentes do RC Celta e dos seguintes clubs de Primeira División: Getafe CF, Cádiz CF, Granada CF, Athletic Club, Levante UD, Villareal CF, Real Sociedade, Deportivo Alavés, RCD Espanyol, RCD Mallorca, Real Betis Balompé e Club Atlético Osasuna.
Unha nova oportunidade de comercio electrónico para os clubs españois
LaLiga está continuamente buscando maneiras de traballar con novas tecnoloxías, así como oportunidades comerciais que permitan aos clubs de LaLiga Santander e LaLiga SmartBank a evolucionar e desenvolverse. Grazas a esta colaboración con Amazon, os clubs de fútbol profesional de España teñen a oportunidade de chegar a máis seguidores fóra de España.
No desenvolvemento desta iniciativa, LaLiga coordinarase con cada un dos clubs participantes para garantir a produción e dispoñibilidade en tempo e forma dos produtos postos á venda, co fin de ofrecer aos seus clientes unha nova e gran experiencia de compra. Os clubs veranse beneficiados pola infraestrutura de Amazon e poderán actualizar facilmente o seu inventario e oferta comercial dentro da tenda online.
- Reino Unido: amazon.co.uk/laliga
- Francia: amazon.fr/laliga
- Italia: amazon.it/laliga
- Alemaña: amazon.de/laliga
