A preventa da segunda remesa da camiseta especial en homenaxe a Vigo e á Reconquista e inspirada en Oliveira dos Cen Anos, esgótase novamente en tempo récord.
Unha vez máis, o celtismo superou todo tipo de expectativas e esta segunda remesa, que constaba de 1.500 unidades, tan só durou media hora, batendo todos os récords existentes de vendas de camisetas do club ata a data. A tenda en liña rio1923.gal tramitou neste curto período máis de 1.100 pedidos, chegando a xestionar un pico de 200 encargas en menos dun minuto. Nestes momentos, apenas quedan unhas poucas unidades da versión de porteiro e tallas soltas da versión infantil. Unha esperadísima preventa que traspasou fronteiras rexistrándose pedidos nun total de 14 países, destacando o volume de Suíza, Portugal, Estados Unidos e Alemaña.
⚠ Lembramos que todos os pedidos rexistrados na preventa desta tarde enviaranse a partir do próximo 25 de abril.
O RC Celta e hummel xa traballan da man para ofrecer canto antes unha terceira edición desta camiseta que, sen dúbida, xa é parte da nosa historia.
