O club extendeu ata o 3 de xullo o prazo para aproveitar as condicións promocionais
Este venres finaliza o prazo estendido para aproveitar as vantaxes especiais da Campaña de Abonados. A gran afluencia de celtistas rexistrada nos primeiros días desta semana levou ao club a prolongar as condicións promocionais, que finalizaban o martes, ata o día 3 de xullo. Os celtistas que aínda non tramitasen o seu abono están a tempo de beneficiarse do 5% de desconto nas renovacións, acumulable aos descontos de accionista e familiar ata un máximo do 15%, e a exención no pago de suplementos nos partidos designados como ‘Días do Club’ tanto en renovacións como novas altas.
Ás vantaxes especiais súmase a continuidade no prezo dos abonos respecto da pasada tempada, sen subida algunha, para premiar a fidelidade dos abonados celestes e propiciar o aumento da masa social. Ademais, un ano máis o RC Celta ofrece aos seus abonados a posibilidade de fraccionar o pago do carné ata 3 meses sen intereses co Cartón Comercio e VISA Abanca ou ata 12 meses cunha pequena recarga solicitando o Credicelta.
O Celta afronta a tempada 2015/2016 coa máxima ilusión nun ano no que o celtismo celebra 50 campañas competindo na máxima categoría do fútbol español. O club anima a todos os celtistas a renovar ou dar de alta o seu carné e formar parte dun proxecto incriblemente emocionante e prometedor. Todos os trámites poden realizarse nos despachos de billetes do estadio de luns a venres de 9.00 a 20.00 horas de maneira ininterrompida ou as 24 horas do día na plataforma online www.celtavigo.org/abonosCelta
