Comeza a tomar forma o ilusionante proxecto de escolas internacionais que o Celta e a súa fundación puxeron en marcha esta tempada. Nas últimas horas tivo lugar o acto de inauguración da escola “Celta Gipsy” situada no Colexio Gipsy Americano de Cidade da Carmen, prestixiosa entidade que conta con 22 anos de experiencia educativa e 750 alumnos de diversos países. Esta será a segunda escola que porá en marcha a entidade celeste, tras a academia de Campeche xa consolidada e con máis de 150 xogadores que compiten en torneos locais.
Durante o emotivo acto de presentación, o presidente do Celta Carlos Mouriño dedicou unhas palabras aos 200 novos asistentes animándolles a formarse e a gozar do fútbol. Destacou ademais a enorme satisfacción que tanto para el como para o club celeste supón a creación dun novo espazo para o desenvolvemento e o crecemento futbolístico e a difusión dos valores do celtismo. “No fútbol para min non hai nada máis gratificante que ver como un canteirán desenvólvese no Celta e acaba xogando no Primeiro Equipo”, afirmou o mandatario celeste para resaltar a decidido aposta que tanto o Real Club Celta de Vigo como a súa Fundación fan pola formación dos mozos deportistas.
A Escola do Celta en Cidade da Carmen vai estar coordinada por Enrique Morais, ex xogador de fútbol profesional e con ampla experiencia como adestrador. Enrique asistiu ao I Curso de Directores de Escolas do Celta que tivo lugar en febreiro nas instalacións da Madroa, cunha duración de tres semanas. A este curso asistiron tamén os técnicos que van liderar as escolas do Celta en Guadalaxara (México) e Arxentina, que tamén se presentarán oficialmente este ano.
