Atractiva promoción de cara á volta de 1/16 de final da Copa, un encontro que promete emoción
O RC Celta ofrece aos seus abonados unha oferta especial de cara ao decisivo partido de Copa do Rei que acollerá Balaídos o vindeiro martes 16 de decembro ante a UD As Palmas (20:00 horas).
Os abonados celestes poderán adquirir entradas para acompañantes por tan só 10 euros, un prezo moi atractivo para un choque que augura moita emoción, xa que o conxunto céltico necesita vencer se quere clasificarse á seguinte rolda da competición copeira.
Os billetes para acompañantes poden adquirirse para a mesma bancada da que se é abonado, ata fin de existencias, e de calquera categoría. Por outra banda, as entradas para o público en xeral manteñen os prezos habituais desde a pasada tempada: entre 25 e 50 euros para categoría Adulto e entre 15 e 25 euros para categoría Sub-25.
O club anima aos abonados a aproveitar esta promoción, que premia a súa fidelidade e incesante apoio, e acudir ao estadio para empuxar ao equipo cara a un triunfo que permita ao celtismo continuar gozando da Copa do Rei.
A oficina de abonados permanecerá pechada o luns, día festivo, e abrirá de novo a partir do martes no seu horario habitual, de 10 a 14 e de 17 a 20 horas. As entradas ordinarias poden adquirirse tamén a través da plataforma online: www.celtavigo.org/taquillaCelta
