Máis de 10.000 persoas participaron durante a tempada 2025/26 nalgunha das experiencias impulsadas pola Área Celtista do Celta, consolidando un proxecto que combina patrimonio, entretemento e turismo deportivo.
O que durante anos foi un estadio aberto unicamente os días de partido xa se está a converter nun espazo onde descubrir a historia do club, acceder a recunchos habitualmente pechados ao público e gozar de propostas dirixidas a afeccionados, familias, turistas e centros educativos.
Unha oferta que vai máis aló do Tour
O Tour por ABANCA Balaídos continúa a ser a principal experiencia e reúne preto do 60% dos visitantes, pero o crecemento do proxecto apóiase nunha oferta cada vez máis ampla. O Museo Celta, as experiencias de día de partido e as visitas educativas de Celta Escolas permitiron achegar o club a públicos moi diversos.
Un dos grandes atractivos da tempada foi o calendario de Tours Especiais, con percorridos temáticos adaptados á actualidade do club e a distintas celebracións. Propostas como o Tour Nocturno, o Tour con Lendas ou o percorrido “Antes dunha Noite Europea” reuniron máis de 1.100 participantes, demostrando o interese por experiencias renovadas.
Vivir o Celta desde dentro
As experiencias de día de partido tamén rexistraron unha gran acollida, con preto de 2.000 participantes. Actividades como Abandeirados, Escort Kids, os tours previos ao encontro ou os lanzamentos de penaltis sobre o céspede permiten transformar a asistencia a ABANCA Balaídos nun recordo único. O proxecto mantén ademais unha importante dimensión educativa grazas a Celta Escolas, que achegou a historia e os valores do club a preto dun milleiro de escolares durante o seu primeiro ano.
Un destino con proxección internacional
Aínda que a maioría dos visitantes proceden de Galicia, o Tour recibe cada vez máis afeccionados do resto de España e de países como Portugal, Brasil, Estados Unidos, Francia, Italia, Reino Unido ou Xapón. A valoración media do Tour e do Museo mantense en 4,6 estrelas en Google, reflexo da boa acollida do proxecto. Os primeiros datos da tempada 2026/27 reforzan esta tendencia: en xullo de 2026 o número de visitantes aumentou preto dun 57% respecto ao mesmo mes do ano anterior, mentres que os ingresos creceron un 40%. Unhas cifras que consolidan ABANCA Balaídos como un novo referente do turismo deportivo e unha forma diferente de descubrir o celtismo.
