O Celta chega á sétima xornada de Primeira División cunha gran ilusión tras seis xornadas sen coñecer a derrota. O equipo vigués mídese este venres ao Getafe en Balaídos, un partido no que os celestes poden asinar o mellor arranque ligueiro dos últimos 73 anos.
Derrotar ao cadro madrileño permitiría aos celestes superar o rexistro da tempada 1947/48, na que o Celta comezou o campionato ligueiro con catro vitorias e dous empates e caeu na sétima xornada ante o Sabadell. No punto de mira quedaría o mellor arranque do club olívico en Primeira División, o da 1941/42, na que se perdeu na novena xornada ante o Espanyol tras cultivar seis triunfos e dous empates.
O RC Celta anima a todos os abonados e afeccionados celtistas a que acudan ao estadio para ser protagonistas nun día que pode pasar a formar parte dos rexistros históricos do club. O empuxe e a calor da bancada e a súa comuñón cos xogadores volverán ser de vital importancia para manter o magnífico refacho de resultados que vive o equipo.
Os prezos das entradas fixados para este encontro son un aliciente máis: desde 20€ para adultos e desde tan só 15€ para os afeccionados Sub-25. O despacho de billetes de Balaídos abre este xoves de 10 a 14 e de 17 a 20 horas e o día do partido farao desde as 10 até o inicio do choque de maneira ininterrompida. Ademais a web oficial permite adquirir os billetes en calquera momento do día: www.celtavigo.org/taquillaCelta
