O Celta e o Celta Baloncesto, co apoio da Fundación Celta, renovaron esta mañá o seu histórico convenio de colaboración, reafirmando un vínculo que representa un dos exemplos máis sólidos de cooperación entre entidades deportivas da cidade de Vigo. O novo acordo terá unha duración inicial de dous anos e inclúe unha ampliación prevista por outros dous, garantindo así a continuidade dun proxecto común que seguirá impulsando o deporte de base e a formación de mozas e mozos deportistas durante as próximas tempadas.
No acto de sinatura, celebrado esta mañá nas oficinas da Sede, estiveron presentes a presidenta do Celta, Marián Mouriño; o presidente do CD Bosco Celta Baloncesto, Carlos Álvarez; o director da Fundación Celta, Germán Arteta; o director deportivo do CD Bosco Celta Baloncesto, Carlos Colinas; e a responsable da Área Social do CD Bosco Celta Baloncesto, Mar Mariño.
A través deste acordo, o Celta mantén o seu compromiso cun club fondamente arraigado na cidade, que comparte os mesmos valores de esforzo, formación, traballo en equipo e desenvolvemento integral das persoas a través do deporte. O convenio seguirá contemplando o acceso das persoas abonadas do Celta aos partidos do Celta Baloncesto, diversas accións de promoción conxunta, apoio técnico e a cesión da marca Celta, fortalecendo a identidade compartida entre ambas as entidades.
Esta renovación chega ademais nun momento especialmente ilusionante para o Celta Baloncesto, que afrontará a próxima tempada na Liga Feminina Endesa tras lograr recentemente o ascenso á máxima categoría do baloncesto feminino español. Un fito que confirma o crecemento deportivo dunha entidade histórica e que supón un novo impulso para un proxecto que continúa mirando ao futuro con ambición.
A Fundación Celta desempeñará novamente un papel fundamental dentro desta alianza. Fiel ao seu compromiso co desenvolvemento social e educativo a través do deporte, a entidade seguirá impulsando iniciativas destinadas a potenciar a formación integral das xogadoras das categorías inferiores do Celta Baloncesto. Máis alá da competición, a Fundación continuará utilizando o deporte como unha ferramenta transformadora para transmitir valores, fomentar hábitos de vida saudables e acompañar ás mozas deportistas no seu crecemento persoal, académico e deportivo.
