Un gran rival para un torneo especial para o celtismo que se disputa o 3 de agosto
O Real Club Celta medirase a un histórico da Premier League no XVIII Memorial Quinocho, un torneo estival de gran valor sentimental para o celtismo que na súa próxima edición terá como protagonista ao Southampton F.C. Este interesante encontro de preparación, o primeiro da pretemporada en Balaídos, terá lugar o sábado 3 de agosto no Estadio celeste.
A XVIII edición do Memorial Quinocho, un torneo especial para a afección polo enorme agarimo que lle profesa ao ex xerente celeste, deparará esta pretemporada un apaixonante encontro entre o equipo vigués e o Southampton de Mauricio Pochettino, conxunto que ten como referencia ao dianteiro Rickie Lambert, autor de quince goles na pasada tempada, un dos máximos anotadores ingleses da Premier League.
