O RC Celta de Vigo puxo esta tarde o broche institucional á tempada cunha recepción oficial no Concello de Vigo. O alcalde, Abel Caballero, recibiu á presidenta, Marián Mouriño, xunto a xogadores, conselleiros, directivos e representantes do club.
Durante a recepción, o alcalde felicitou ao equipo pola clasificación para a UEFA Europa League e destacou o traballo realizado ao longo do curso. Ademais, tamén fixo referencia ao avance da futura bancada de Gol, cada vez máis preto de converterse nunha realidade.
Pola súa banda, a presidenta do Celta tamén quixo falar do estadio, mencionando esa recente concesión, e agradeceu o apoio institucional, poñendo en valor a boa sintonía entre o club e o Concello ao destacar que “as cousas están indo ben porque todo o mundo está remando na mesma dirección”.
