Centos de afeccionados celestes congregábanse ás portas das tendas oficiais do RC Celta, desde primeira hora da mañá, para facerse coa camiseta especial en honra a Vigo e a súa Reconquista e inspirada en “Oliveira dos Cen Anos“.
O lanzamento desta peza conmemorativa anunciábase o pasado xoves pero non era ata este luns ás 10:00 horas cando saía á venda. A cota reservada para a venda en liña esgotouse en apenas 3 minutos. Mentres tanto, as tendas oficiais da Sede e Abanca Balaídos rexistraron unha longa e intensa actividade ata primeira hora da tarde cando se despacharon as últimas unidades das tallas de adulto. Nestes momentos, están dispoñibles nas tendas físicas as últimas unidades de tallas infantís e da versión de porteiro en cor branca.
Para poñer en contexto o éxito deste lanzamento, o número de camisetas vendidas en apenas unhas horas triplicou o récord de vendas histórico do club nun único día.
Tal e como se anunciou, tratouse dunha primeira tirada de 1.809 unidades lanzadas con motivo da Reconquista. Á vista da alta demanda existente por parte do celtismo, o club xa traballa da man de Hummel para ofrecer unha segunda edición.
