A Organización Nacional de Ciegos Españoles, ONCE, dedicará o cupón do próximo mércores 23 de agosto ao Centenario do RC Celta, que ese día celebra os seus primeiros 100 anos de vida, un acontecemento que se difundirá nos cinco millóns de cupóns que se distribuirán por toda España nos puntos de venda autorizados por esta organización.
A ONCE lembra que o 23 de agosto de 1923 naceu o Real Club Celta de Vigo tras a fusión do Vigo Sporting e o Fortuna de Vigo e na tempada 1935/36 logrou o seu primeiro ascenso a Primeira División, categoría na que xogou no últimos once anos de maneira consecutiva.
“O Celta forma parte dos equipos máis históricos de España ao ser un dos dez clubs con 57 tempadas disputadas no Campionato Nacional de Liga de Primeira División. Na Copa do Rei logrou tres subcampeonatos (1948, 1994 e 2001), alcanzando as semifinais da competición en oito ocasiones”, subliña a entidade.
O Cupón Diario da ONCE pon en xogo un premio de 500.000 euros ao número máis a serie, e 49 premios de 35.000 euros ás cinco cifras do número premiado. Ademais: 450 premios de 250 euros ás catro primeiras cifras e outros 450 premios ás catro últimas; 9.000 premios de 25 euros no caso de tres últimas ou tres primeiras; e o mesmo para as dúas primeiras e últimas (6 euros), e reintegro de 2 euros á primeira ou a última cifra do número premiado.
