É o momento de dous dos grandes acenos de identidade do RC Celta: a afección e a canteira. O club está a realizar un enorme esforzo para medrar ao redor dos xogadores formados nas categorías inferiores, que, a día de hoxe, son no primeiro equipo nada menos que oito. A canteira é motivo de orgullo para o celtismo e un referente no fútbol español e internacional. A afección, recoñecida como a mellor do país a pasada campaña, ten agora a oportunidade de reforzar e impulsar este proxecto e arroupar a un equipo que sen dúbida seduce e ilusiona.
As vantaxes da campaña de abonados conclúen o día 19 do presente mes, data na que se liberarán os asentos daqueles socios que non tramitasen a súa renovación para acoller aos novos membros da familia celeste. O club anima aos abonados a que renoven antes desa data para gozar destas vantaxes, conservar o seu asento e ser partícipes dun proxecto creado ao redor da canteira celeste que convida a gozar e a soñar. Poden tramitar o seu abono na rede de caixeiros de Abanca en toda Galicia e tamén completar todas as xestións, incluída o financiamento, online en istovaidecorazon.rccelta.es.
O arranque da tempada preséntase apaixonante con dous partidos en Abanca Balaídos ante equipos de gran nivel e enorme atractivo como Real Madrid e Valencia. O equipo necesitará o apoio da bancada para comezar con forza unha campaña especialmente esperanzadora. Até o día 19 de xullo, quen renoven o seu carné non deberán retirar suplemento os días do club e gozarán dun desconto, non acumulable co resto, do 20 por cento se traen un novo abonado (excepto Miudiño).
Ademais, disporán de descontos do 5 por cento ou do 10 por cento de familiar ou accionista até un máximo do 15 e terán prioridade nos trámites de cambio de asento.
