Oliveira dos Cen Anos, o himno do centenario do RC Celta que levantou paixóns máis aló do celtismo e o mundo do fútbol, logrou un novo recoñecemento de carácter internacional. O Eurobest Festival of Creativity, un dos certames publicitarios máis importantes a nivel mundial no que se premia a “excelencia creativa”, outorgou ao RC Celta, C.Tangana e Little Spain un Premio Bronce pola produción audiovisual e musical do himno.
O nome do club celeste destaca na lista de gañadores xunto ao de grandes marcas como Heineken, Magnum, Orange, Dove, Prime ou Channel 4, entre outros. Estes galardóns están organizados polo Cannes Lions International Festival of Creativity, a maior reunión de talento creativo e publicitario da industria da comunicación, o cal resalta mesmo máis a entidade e dimensión do premio recibido polo club vigués, o compositor celtista e a produtora audiovisual.
