O Celta pecha a compra do edificio do Mercantil, en Príncipe, e fai historia ao dotarse de patrimonio
Fito histórico, gran paso adiante do Real Club Celta, que avanza con paso firme na realización de proxectos que garantan un futuro estable e ilusionante. O presidente do club, Carlos Mouriño, pechou hoxe a compra do edificio que albergará a sede social da entidade, un inmoble situado no corazón de Vigo, na rúa do Príncipe, e que pertencía ao Círculo Mercantil, que coa venda desta propiedade garante a súa viabilidade.
Con esta operación, o Real Club Celta dispón por fin de patrimonio cunha sede social que permitirá ademais a apertura de novas vías de negocio e propiciará unha relación máis próxima do club coa súa afección.
Antes da firma, o presidente celeste púxose en contacto coas dúas candidaturas que se presentarán ás eleccións da xunta directiva do Mercantil para explicarlles de maneira minuciosa as condicións de compra-venda recollidas nas escrituras e coas que expresaron a súa total conformidade.
O club quere expresar a súa gran satisfacción por esta adquisición que xa forma parte da historia da entidade e que supón un avance de enorme importancia no proxecto celeste encamiñado a non só ser un equipo, senón ser un club e quere ademais mostrar o seu agradecemento e os seus mellores desexos ao Círculo Mercantil.
