O vindeiro xoves 6 de xullo o RC Celta e C.Tangana presentarán o Himno do Centenario. A preestrea desta peza histórica realizarase no Teatro Afundación de Vigo ás 20h. Contaremos na cita con todo o equipo artístico que colaborou neste proxecto e, por suposto, con Antón Álvarez (C.Tangana), responsable da composición e director da peza audiovisual que o acompaña.
Queremos que a afección do RC Celta estea presente neste momento histórico. Por ese motivo reservamos parte do aforo do teatro para os nosos seguidores. Unha parte para os nosos abonados, e outra para todos aqueles afeccionados que participaron na rodaxe do vídeo.
Se es abonado do RC Celta podes participar no sorteo de entradas a través desta ligazón.
Se participaches na rodaxe do videoclip do himno, o pasado 4 de xuño en Rande, podes participar no sorteo de entradas nesta ligazón.
O prazo para participar en ambos os sorteos finaliza o vindeiro martes 4 ás 12 do mediodía. Lembra que se cumpres ambas as condicións, podes participar nos dous sorteos.
Sempre Celta!
