Preferencia e Marcador esgotan a súa capacidade. Balaídos presentará un ambiente espectacular
O último partido da tempada no estadio de Balaídos levantou unha gran expectación entre a afección celtista. Coa permanencia xa asegurada, o celtismo terá a oportunidade de gozar dunha emocionante xornada coa visita dun dos equipos punteiros do campionato, o Real Madrid (domingo, 19:00 horas), ante o que o RC Celta loitará por agasallar aos afeccionados cunha vitoria que lles permita continuar crecendo na clasificación.
A falta duns días para o encontro, as bancadas de Preferencia e Marcador xa esgotaron o seu aforamento e as demais contan por centos as butacas dispoñibles. En total restan unhas 700 entradas por despachar, polo que o cheo está practicamente garantido. Balaídos vivirá un día de festividade e auténtico ambiente celtista.
Os prezos dos billetes para este partido, penúltima xornada ligueira, oscilan entre os 50 e 70 euros para a categoría sub-24 e entre os 70 e 100 euros para adulto. Ao ser Día do Club, os abonados que renovaron ou se deron de alta despois do 19 de xullo ou 31 de decembro en caso dos anuais deberán retirar un suplemento de 20 euros en categoría adulto e de 10 euros en Sub-24, mentres que aqueles que tramitaron o seu carné con anterioridade ás devanditas datas poderán acudir ao encontro sen ningún custo.
Os afeccionados e abonados poden adquirir entradas e suplementos na oficina de abonados de luns a venres en horario de 10 a 14 e de 17 a 20 horas. Ademais, os billetes poderán adquirirse desde mañá a través do despacho de billetes virtual, dispoñible as 24 horas o sete días da semana: www.celtavigo.org/taquillaCelta
