O RC Celta, a súa afección e a cidade vivirán este sábado 17 de marzo un acontecemento histórico: o club desembarca no corazón de Vigo cunha nova sede social situada na céntrica rúa do Príncipe, un edificio aberto ao celtismo e a cidadanía.
Animación na rúa, concertos, a presenza do primeiro equipo… o club prepara unha xornada de celebración e celtismo que se desenvolverá ao longo de todo o día e na que poderán participar todos os cidadáns.
Tras a festa do sábado, que terá lugar na contorna da nova sede celeste, os afeccionados que o desexen poderán visitar o domingo 18, luns 19 e martes 20 o interior de A Sede. Serán tres xornadas de portas abertas para que calquera poida coñecer a fondo as instalacións, xa que se poderá realizar un percorrido completo por cada unha das plantas do edificio.
Nos próximos días o club facilitará máis detalles sobre estas xornadas de portas abertas propostas para que ninguén quede sen coñecer A Sede e viva desde dentro a chegada do RC Celta ao corazón da cidade.
