O Real Club Celta de Vigo e o seu patrocinador, Cabreiroá, acompañaron esta mañá ao porteiro celeste Sergio Álvarez ao pavillón da Granxa en Verín para visitar aos nenos das escolas deportivas da cidade ourensá. O xogador tivo ademais a oportunidade de visitar o manancial de Cabreiroá e de saudar aos seus empregados.
Durante o acto, Sergio respondeu as inquietudes dos máis pequenos, parou varios dos seus penaltis e presenciou xunto a eles á actuación do Mago Xacobe. Finalmente, a meta celeste regalou varias camisetas do Celta e da Selección Española entre os máis de 200 nenos.
O club celeste, da man dun dos seus principais patrocinadores, continúa así fomentando o celtismo e sobre todo os hábitos saudables como a práctica deportiva regular, fundamental para un óptimo desenvolvemento dos máis novos.
