O RC Celta prepárase para vivir un día inesquecible. Este 7 de setembro, Abanca Balaídos será o escenario dunha xornada dobre moi especial que contará co segundo encontro da tempada do Fortuna en casa e o debut de As Celtas.
A tarde comezará ás 15:30h cunha sesión de DJ que quentará motores para o primeiro gran choque do día: As Celtas – Victoria CF. Ás 16:30h, as pupilas de Vicky Vázquez disputarán o seu primeiro partido oficial en casa nun duelo que marcará o inicio do que seguro será unha emocionante andaina na liga.
Durante o descanso deste, o celtismo poderá gozar dun concerto de Fillas de Cassandra e ao termo do partido de As Celtas, o DJ ofrecerá unha segunda sesión.
Ás 19:30h, o Celta Fortuna saltará ao campo para enfrontarse ao Arenteiro no segundo encontro do día, derbi correspondente á Xornada 3 do Grupo 1 de Primeira Federación.
Durante toda a tarde celeste, os asistentes poderán gozar dunha promoción especial nas cantinas: choripán ou cachorro quente con patacas e refresco por 2,95 euros.
Para asistir a ambos os partidos, dispúxose dunha entrada única que permitirá gozar desta xornada histórica. Todos os posuidores do Carné Celtista Abonado ou Carné Celtista, en calquera das súas modalidades, poderán acceder de maneira gratuíta. Para o resto dos afeccionados, as entradas estarán dispoñibles por 10 euros, en despachos de billetes e na web oficial do club.
Todos aqueles que non poidan asistir, terán a posibilidade de seguir o partido de As Celtas en directo a través da canle oficial de YouTube do RC Celta.
O RC Celta espera contar co apoio de todo o celtismo neste día tan especial, onde comeza un dos proxectos máis ilusionantes da tempada 24/25, As Celtas, e continúa forxándose un dos piares fundamentais do club, a canteira. O celtismo somos todos, e xuntos escribiremos historia en Abanca Balaídos.
Vémonos, afección!
