Os arredores do estadio de Balaídos contarán este mércores, día do decisivo partido de Copa do Rei ante o Real Madrid, cunha fanzone que terá como gran protagonista o trofeo do torneo copeiro. Todos os afeccionados que acudan a este espazo poderán ver a Copa a partir das 12:00 e fotografarse con ela, participar en sorteos e diversas actividades de animación (pista de slot, futbolín, portaría inchable) e coñecer aos xogadores Claudio Beauvue e Borja Iglesias de 19:00 a 20:00.
Entre todos os afeccionados que publiquen en Twitter a súa foto coa Copa do Rei acompañada do hashtag #fanzone, sortearase unha entrada dobre para o partido dese mesmo día entre Celta e Real Madrid (21:15, Balaídos). O gañador anunciarase nas redes sociais de RC Celta ás 14:00 horas. O resto de participantes deste concurso entrarán no sorteo de dúas camisetas asinadas polo plantel celeste.
