O torneo, moi especial para o celtismo, disputarase o sábado 16 ás 21.00 horas
Os seguidores celestes xa teñen á súa disposición nas oficinas de abonados do club as entradas para o partido de presentación do Real Club Celta ante a súa afección en Balaidos, ante o Cagliari Calcio, da Serie A italiana, no marco do XIX Memorial Quinocho, trofeo estival de especial significado para a familia celtista. O encontro disputarase o sábado 16 do presente mes ás 21.00 horas no estadio vigués.
As entradas, con prezos entre os 10 e 15 euros en categoría sub-25 e entre 15 e 40 para adultos, poden adquirirse xa nas oficinas de abonados do club de martes a xoves de 10:00 a 14:00 e de 17:00 a 20:00 horas e o sábado, día de partido, nos despachos de billetes do estadio de 10.00 a 14:00 horas e desde as 17:00 ata o inicio do encontro. Os abonados poderán acceder co seu carné da tempada 2014/2015.
