O Celta e o Racing de Santander alcanzaron un acordo para a cesión de Damián Rodríguez ata o final da presente tempada. O centrocampista de Ponteareas porá rumbo a Santander para disputar o segundo tramo do curso.
Por primeira vez, o canteirán sairá dos muros de A Madroa, Afouteza e Abanca Balaídos para embarcarse nunha nova aventura profesional, que se prolongará ata o próximo mes de xuño. Faino tras defender a camiseta celeste en 29 encontros oficiais co primeiro equipo entre LALIGA EA SPORTS, Copa do Rei e UEFA Europa League, sumando 1.648 minutos, un gol e tres asistencias.
Referente para a canteira e orgullo de todo o celtismo, que foi testemuña de como aquel pequeno recollepelotas que miraba con admiración a Iago Aspas chegou a compartir vestiario con el en competición europea, Damián logrou gañarse o agarimo da afección non só polo seu esforzo, traballo e compromiso sobre o céspede, senón tamén pola súa maneira de ser fóra do campo.
O Celta deséxalle o maior dos éxitos neste novo capítulo da súa carreira, seguro de que seguirá medrando e deixando pegada.
Sorte, Damián!
