O Real Betis, decimosegundo clasificado con 37 puntos tras derrotar ao Levante a pasada xornada, visita Balaídos este sábado ás 22:05 horas. Os vigueses afrontan este encontro dispostos a sumar tres puntos craves que permitan dar un paso máis cara ao ilusionante regreso do club celeste a Europa, un obxectivo só alcanzable coa unión de equipo e afección. Faltan seis partidos para finalizar a tempada en Primeira División e o Celta ocupa unha posición privilexiada, quinto con 52 puntos, tras encadear catro xornadas sen coñecer a derrota. Un triunfo ante o Real Betis pode consolidar aos celestes na zona nobre da táboa e facer máis posible o soño europeo do celtismo.
O club recupera para este choque os prezos habituais desde a pasada tempada, con entradas desde 20€ para categoría ADULTO e desde 15€ para SUB-25. Os despachos de billetes do estadio permancerán abertas até o venres de 10 a 14 e de 17 a 20 horas e o sábado de 10 a 22 horas de maneira ininterrompida. Os billetes poden adquirirse en calquera momento do día a través da web www.celtavigo.org/taquillaCelta
