Andreu Fontàs sumou un centenar de partidos en Primeira División este domingo en Anoeta ante a Real Sociedade. O xogador catalán, de 27 anos, debutou na máxima categoría do fútbol español o 31 de Agosto de 2009 no Camp Nou defendendo a camiseta do FC Barcelona, club no que se formou, ante o Real Sporting. O defensor entrou no minuto 84 en substitución de Gerard Piqué.
“Xogar en Primeira era o meu soño de pequeno e chegar aos 100 partidos faime moi feliz”, asegura Fontàs. Do centenar de encontros, 83 disputounos co Celta, un dato que non se lle escapa ao defensor: “Considereime xogador de Primeira cando cheguei ao Celta. Xogara antes algúns partidos, pero non coa regularidade que tiven aquí”.