MIRA O GOLAZO DE IAGO ASPAS AQUÍ
Iago Aspas está a vivir o momento máis doce da súa carreira. Asinou un mes de outubro sobresaliente con cinco goles e unha asistencia, foi convocado a semana pasada pola Selección Española por primeira vez na súa carreira, recibiu este luns o premio ao Mellor Xogador de LaLiga de Outubro e onte brillou no seu debut con ‘a Vermella’ ante Inglaterra no mítico estadio de Wembley.
O canteirán celeste entrou ao terreo de xogo tras o descanso, en substitución de Mata. Desde o primeiro momento Aspas entregouse ao máximo, deixou moi bos detalles e fixo traballar á defensa inglesa. Por se todo isto fose pouco, a catro minutos para o final do partido e cun 2-0 en contra, Aspas asinou unha obra de arte en forma de gol, unha vistosa diana que marcou o camiño cara ao empate, conseguido no tempo de prolongación grazas a un tanto de Isco.
“Estou moi feliz. É un debut soñado”, asegurou Aspas tras o amigable. O xogador galego chega este mércores a Vigo e mañá incorporarase aos adestramentos do equipo na Madroa.
