Iago Aspas cumpriu o sábado contra o Villarreal 150 partidos co RC Celta en Primeira División. O dianteiro de Moaña é o 25º futbolista celeste en chegar a esta cifra na máxima categoría do fútbol español. Ata o momento, o canteirán participou directamente nun centenar de goles do equipo en Primeira, acumulando 77 tantos e 23 asistencias, a última delas a Brais Méndez no derradeiro encontro de LaLiga.
Iago Aspas atesora sendos Trofeos Zarra nas dúas últimas tempadas e na actual suma dez goles que lle permiten liderar a carreira para conseguir ou seu terceiro premio consecutivo.
