O Celta sumou un valioso punto no Benito Villamarín, onde logrou remontar dúas veces un partido espectacular. Os celestes, espléndidos en moitas fases, encaixaron dúas tantos a balón parado, un de penalti, pero lograron sempre reaccionar cun dobrete de Iago Aspas e un gol de Roncaglia.
O Celta acaparou a posesión desde o inicio ante un rival envorcado en defensa. O seu dominio, absoluto, cristalizou no minuto quince de partido. Longa posesión, centro de Bongonda, colócaa Wass no outro pau e remata a gol Iago Aspas.
Aos 40 minutos, co partido axitado polo cadro local e a bancada, o colexiado sinalou penalti a favor do Betis. Rubén Castro anotou e igualou o partido. Pau para os célticos, que controlaran o choque con mestría e fóronse ao descanso cun empate que non premiaba en absoluto a súa superioridade.
Tras a continuación, o Betis saíu con forza e logrou arrebatarlle a posesión aos celestes. Berizzo reaccionou cun cambio ofensivo que supuxo a reaparición de Orellana. Non houbo tempo, aos poucos segundos, Sanabria adiantou ao cadro local tras un rebote afortunado.
Os célticos reaccionaron de maneira prodixiosa, e co seu estilo, Longa posesión, balón en profundidade cara a Bongonda, centro desde a liña de fondo e remate, como non, de Iago Aspas, que levou o coiro á rede de maneira acrobática.
O empate desfíxose a balón parado cun cabezazo de Pezzela á saída dun córner. De novo, o Celta estaba por baixo no marcador. Os vigueses buscaron o empate con insistencia… e atopárono de córner. Roncaglia cabeceou á rede para empatar de novo o choque e o Celta levou un máis que merecido punto.
FICHA TÉCNICA
3-R Betis: Adán, Cejudo, Bruno (Navarro, min.46), Pezzella, José Carlos, Durmisi, Donk (Gutiérrez, min.70), Petros, Ceballos, Sanabria (Joaquín, min.62) e Rubén Castro.
3-RC Celta: Rubén, Roncaglia, Cabral, Fontás, Jonny, Radoja (Orellana, min.52), Marcelo Díaz (Sisto, min.86), Pablo Hernández, Wass, Bongonda (Rossi, min.83) e Iago Aspas.
Goles: 0-1, min.15: Iago Aspas; 1-1, Rubén Castro, de penalti; 2-1, min.52: Sanabria; 2-2, min.61: Iago Aspas; 3-2, min.72: Pezzella; 3-3, min.84: Roncaglia.
Árbitro: Sánchez Martínez, do comité murciano. Expulsou con dobre amarela a Petros (91’) e amonestou a Donk, Sanabria, Gutiérrez, Pezzella, Cabral.
Campo: Benito Villamarín.
