O Día de Reis é un dos días máis máxicos do ano que se vive con nervios e ilusión desde primeira hora da mañá. Por iso, o Celta quere compartir esa maxia co celtismo co tradicional adestramento a portas abertas do primeiro equipo celeste en Abanca Balaídos que terá lugar na véspera da chegada das súas maxestades, o vindeiro luns, 5 de xaneiro, ás 11:00 horas.
Será unha mañá especial, pensada para gozar en familia xunto ao Celta nun día marcado pola ilusión, especialmente dos máis pequenos, que poderán adiantar o seu agasallo de Reis vendo de preto unha sesión preparatoria dos seus ídolos. Con esta xornada especial, o club quere agradecer unha vez máis o apoio constante dunha afección, sempre presente, que acompaña ao equipo xornada tras xornada, mesmo, máis aló das nosas fronteiras.
O adestramento comezará ás 11:00 horas, polo que a apertura de portas realizarase ás 10:30 horas e o acceso ao estadio será pola Bancada de Tribuna (alta e baixa). Ao finalizar a sesión, os xogadores protagonizarán o tradicional lanzamento de balóns, ademais de asinar autógrafos e facerse fotos con todos os afeccionados celestes.
Esperámosvos en Abanca Balaídos para gozar xuntos do día máis máxico do ano!
