O RC Celta acabou o ano con vitoria en casa ante a Real Sociedad (2-0). Un dobrete de Pablo Durán, que se estreaba como goleador en LALIGA EA SPORTS, deu os tres puntos a un cadro celeste que foi moi superior durante os 90 minutos.
Desde o inicio, os pupilos de Claudio Giráldez dominaron a un conxunto vasco que nunca atopou respostas ante a intensidade e o fútbol fluído do cadro galego. O primeiro tempo foi un monólogo celeste, cun Celta que non só foi superior en intensidade, senón tamén en calidade. A Real Sociedade, un dos equipos máis sólidos da competición, apenas logrou inquietar á defensa local. Remiro e Zubeldia evitaron un marcador máis avultado, pero non puideron conter o ímpeto dun Pablo Durán imparable. A xoia da canteira, viviu unha tarde máxica. Na súa segunda titularidade consecutiva, o mozo dianteiro de 23 anos non tardou en ratificar que a súa subida ao primeiro equipo celeste non é mera casualidade. O seu primeiro gol chegou no minuto 40, tras un pase de Javi Rodríguez, cando desde a frontal, lanzou un potente disparo que, a pesar de tocar no pau e nas mans de Álex Remiro, terminou no fondo da rede. E apenas seis minutos despois, volveu brillar ao rematar no segundo pau un centro preciso de Alfon despois unha gran xogada colectiva.
Á volta de vestiarios, Imanol Alguacil tentou reaccionar con tres cambios ao descanso, pero o seu equipo seguía sen dar coa tecla, e Balaídos, que tantas veces fora un escenario sinxelo para a Real, converteuse nunha fortaleza inexpugnable. Tanto foi así que o Celta estivo preto de ampliar a vantaxe con outro tanto de Durán, pero este terminou sendo invalidado por fóra de xogo previo de Borja Iglesias.
Con esta vitoria, o RC Celta pecha o ano e prepárase para os retos do 2025. O próximo compromiso dos vigueses será o 5 de xaneiro en Copa del Rey, cando se verán as caras co Racing de Santander, mentres que a volta a LALIGA EA SPORTS está programada para o 10 de xaneiro nun partido a domicilio fronte ao Rayo Vallecano.
FICHA TÉCNICA:
2- RC Celta: Guaita; Javi Rodríguez, Starfelt, Marcos Alonso, Sergio Carreira (Hugo Álvarez 72′); Fran Beltrán, Ilaix Moriba, Mingueza (Pablo Domínguez 90′), Pablo Durán (Swedberg 72′); Alfon González (Franco Cervi 84′) e Borja Iglesias (Douvikas 90′).
0 – Real Sociedad: Remiro; Aramburu, Zubeldia, Aguerd, Aihen Muñoz (Jon Martín 46′); Turrientes (Oskarsson 46′), Brais Méndez (Pablo Marín 83′), Sucic; Barrenetxea (Sheraldo Becker 46′), Sergio Gómez e Oyarzabal (Take Kubo 63′).
Árbitro: Busquets Ferrer (comité balear). Amonestou aos locais Javi Rodríguez, Starfelt e Pablo Durán; e aos visitantes Oyarzabal, Turrientes, Sheraldo Becker, Zubeldia e Kubo.
Goles: 1-0 (40′) Pablo Durán; 2-0 (45′) Pablo Durán.
Incidencias: Partido correspondente á xornada 18 de LALIGA EA SPORTS disputado no Estadio de Abanca Balaídos ante 22.956 espectadores.
