O quinto clasificado da Premier League recibirá aos celestes o 6 de agosto en Prenton Park
O Everton FC será o cuarto opoñente do RC Celta na xira de partidos que os celestes realizarán esta pretempada no Reino Unido. O histórico conxunto británico, quinto clasificado da Premier League e participante na UEFA Europa League 2014/2015, recibirá ao equipo céltico no estadio Prenton Park (estadio do Tranmere Rovers FC) o mércores 6 de agosto ás 19:45h (hora local).
O RC Celta pechará a súa xira británica ante un rival de máximo nivel, o Everton FC. O equipo adestrado polo español Roberto Martínez finalizou a tempada pasada na quinta posición da Premier League inglesa, só por detrás de Manchester City, Liverpool, Chelsea e Arsenal. O club inglés, fundado en 1878, acumula 9 títulos de liga, 5 Copas de Inglaterra e 9 trofeos de campión da Community Shield, ademáis de 1 Recopa de Europa.
No plantel do Everton FC atópanse ata cinco xogadores que recentemente participaron no Mundial de Brasil: os ingleses Baines, Jagielka e Barkley, o atacante belga Kevin Mirallas e o veterano gardameta estadounidense Tim Howard.
