O RC Celta volve a Vigo cun valioso punto tras empatar fronte ao Real Betis Balompié no Benito Villamarín (2-2). Javi Rodríguez e Tasos Douvikas puxeron aos celestes por diante en dúas ocasións, pero os locais, intensos e decididos, lograron igualar o marcador no último suspiro do partido.
O Celta comezou con bo pé, a pesar da asfixiante presión do Betis, cando no minuto 13 atopou premio na súa primeira gran oportunidade do encontro. Javi Rodríguez cazou un rexeite na área tras un lanzamento de falta de Hugo Sotelo, conectando unha volea precisa que rompeu a defensa bética e abriu o marcador. A vantaxe celeste motivou unha reacción inmediata do Betis, que envorcou o seu xogo cara á área rival con ataques incisivos protagonizados por Abde e Vitor Roque. O brasileiro roldou o gol en dúas ocasións e á terceira foi a vencida: definiu con potencia desde o punto de penalti, sorprendeu a Guaita e estableceu o 1-1.
Á volta de vestiarios, o duelo gañou aínda máis intensidade tras os cambios. Movementos en ambos os bancos polos que o Celta se viu favorecido, tenteou a portería rival e logrou mesmo marcar un gol que terminou anulado por fóra de xogo. Minutos de ida e volta e tensión ata a entrada de Williot Swedberg. O sueco reposicionó o sistema, moveuse con destreza polo costado esquerdo, superou a dous defensas e colocou un pase perfecto cara a Douvikas, quen empuxou o balón á rede, poñendo de novo en vantaxe ao Celta.
O gol grego trouxo unha calma que resultou en espellismo, xa que lonxe de pechar o partido, achegou axitación e celeridade aos locais. Nos minutos finais, Pellegrini optou por lanzar balóns á área en busca dunha última oportunidade. Os de Giráldez resistiron os embates ata o minuto 94, cando un centro á área de Chimy Ávila, peiteado cara atrás por Lo Celso, conectou coa cabeza de Bartra para anotar o 2-2 definitivo.
Agora, cun punto máis na clasificación e sumando a súa segunda vitoria a domicilio do curso, o Celta regresa a casa coa mirada posta no seu próximo compromiso. O sábado 23 de novembro, ás 21:00h, Abanca Balaídos recibirá ao FC Barcelona nun duelo que promete ser igual de vibrante.
FICHA TÉCNICA:
2 – Real Betis Balompié: Rui Silva; Sabaly, Diego Llorente (Bartra, min. 56′), Natan, Perraud; Johnny Cardoso (Lo Celso, min. 56′), Altimira; Fornals (Juanmi, min. 75′), Losada (Bakambu, min. 86′), Abde (Chimy Ávila, min. 86′); e Vitor Roque.
2 – Real Club Celta: Guaita; Javi Rodríguez, Starfelt, Marcos Alonso; Mingueza (Hugo Álvarez, min. 57′), Fran Beltrán, Hugo Sotelo (Ilaix Moriba, min. 46′), Ristic (Manquillo, min. 46′); Iago Aspas (Williot Swedberg, min. 79′), Borja Iglesias (Douvikas, min. 67′) e Bamba.
Goles: 0-1 (min. 13’) Javi Rodríguez engancha unha volea tras un balón rexeitado nunha falta lateral, marcando o seu primeiro gol co RC Celta. 1-1 (min. 40’) Vitor Roque dispara duro co interior da perna dereita tras un pase de Johnny Cardoso. 1-2 (min. 82’) Tasos Douvikas remata a pracer tras unha boa xogada de Williot Swedberg. 2-2 (min. 95’) Marc Bartra cabecea con forza un centro do Chimy Ávila que desvía Lo Celso.
Árbitro: Ortiz Arias (Comité Madrileño). Amonestou aos locais Johnny (min. 35′), Natan (min. 83′) e Juanmi (min. 94′).
Incidencias: Partido correspondente á décimo terceira xornada de LALIGA EA SPORTS disputado no estadio Benito Villamarín ante 54.015 espectadores. Antes do asubío inicial gardouse un minuto de silencio como homenaxe ás vítimas e damnificados pola DANA da pasada semana.
