A histórica xira de pretempada do RC Celta deparou onte á noite en México unha esixente estrea. O cadro vigués mediuse a Pumas no Estadio Olímpico Universitario, en altura, baixo unha intensa choiva, sen a súa habitual pel, ante un rival rodado e xa inmerso na súa liga. E o equipo celeste competiu, buscou aproximarse á súa identidade, esforzouse e obtivo un meritorio empate. Iago Aspas foi elixido MVP do partido.
O RC Celta, con Tapia de central e un bo número de canteiráns no once, controlou a primeira metade con longas posesións e apenas sufriu achegamentos de consideración. Tampouco os creou máis aló dos inventos de Iago Aspas. Adiantouse Pumas a balón parado cun cabezazo próximo do brasileiro Diogo de Oliveira, que celebrou con entusiasmo a bancada do estadio. E xa ao fío do descanso, no último minuto, Solari centrou con precisión para que Iago Aspas puidese resarcirse dun cabezazo anterior errado. O canteirán cruzou de cabeza á rede para igualar o partido.
A segunda metade avanzou sen moito ritmo, o contrario que o cansazo dos celestes, que se replegaron e defenderon á espera de poder sorprender á contra. Non houbo goles, pero tampouco lesións, o que é xa unha vitoria en tan complicadas circunstancias.
O RC Celta emprende agora viaxe a Estados Unidos, xa coa súa vestimenta e materiais.
