A Cidade Deportiva Afouteza volveu ser escenario dun amigable desta pretemporada 25/26 recibindo ao CD Nacional de Madeira antes de que o equipo inicie este sábado o seu stage en Alemaña e Suíza, un encontro no que os de Claudio Giráldez dominaron con claridade e empezan a mostrar a identidade que busca o técnico celeste.
Cun once cheo de xogadores Feitos na Madroa (9 dos 11 titulares) e a esperada volta aos terreos de xogo de Javi Rueda, o Celta tomou rapidamente o control do partido cun xogo dinámico, veloz e asociativo, plagado de ocasións. A pesar da clara superioridade, foi un penalti cometido sobre Pablo Durán o que transformaría Hugo Sotelo desde os 11 metros no primeiro tanto celeste como local esta pretemporada. Unha vantaxe coa que os pupilos de Giráldez continuaron presionando a zaga do conxunto luso ata o punto que Williot puxo en serios apuros ao gardameta Kaique obrigándoo a facer unha gran estirada para desviar un tiro envelenado.
Arrincaba a segunda metade e, nesta ocasión a diferenza que nos outros amigables, Claudio Giráldez decidía manter nos primeiros instantes a parte do once inicial buscando dar continuidade ás boas sensacións xeradas nos primeiros 45 minutos. Un segundo tempo na que o Nacional elevou a súa presión e complicou máis a saída de balón celeste, con todo, o Celta respondeu ben en defensa e soubo aproveitar os espazos á contra. Tras os tiros ao pau de Jones El-Abdelloui e Marcos Alonso, sería Hugo González o que tería máis fortuna e subiría o 2-0 definitivo cun disparo cruzado que premiou a insistencia celeste.
Pechábase así a primeira vitoria do Celta esta pretemporada 25/26 dando un gran paso adiante a nivel defensivo e coa portería a cero grazas á gran seguridade baixo paus demostrada por Radu e Iván Villar.
Este sábado, 26 de xullo, o equipo enfrontarase en terras alemás ao Stuttgart, ás 15:30h. no Stadion an der Kreuzeiche, un encontro que se poderá seguir en directo na nosa canle de Youtube.
FICHA TÉCNICA:
Celta: Andrei Radu; Javi Rueda (Sergio Carreira, min. 31), Yoel Lago, Carlos Domínguez, Manu Fernández, Mihailo Ristic; Hugo Sotelo, Miguel Román, Hugo Álvarez; Williot e Pablo Durán. Tras o descanso: Iván Villar, Carl Starfelt, Tincho, Javi Rodríguez, Marcos Alonso, Ilaix Moriba, Damián, Jones El-Abdellaoui, Hugo González e Ferran Jutglà.
CD Nacional de Madeira: Lucas França; Joao Aurelio, Ulisses, Zé Gomes, Matheus Días, André Sousa, Jota, Alan Núñez, Martím Watts e Paulinho. Tamén xogaron: Kaique, Kevyn, Zé Vitor, Laabidi, Ibahiba Ba, Douglas, Deivison, Shatri, Filipe Suárez, Lucas Joao, Jesus Ramírez e Josué
Goles: 1-0, min. 32: Hugo Sotelo (P). 2-0, min. 67: Hugo González.
Árbitro: Álvaro Juncal.
