“Por suposto que estamos a gozar. Estamos a vivir un momento moi bonito e oxalá que dure”, afirma Sergi Gómez que, no entanto, lanza unha mensaxe de cautela: “Somos conscientes do que custou chegar até onde estamos agora e o fácil que se pode escapar. Temos que aferrarnos a iso e non esquecer que ninguén regala nada e que depende de nós”.
O central celeste prefire centrarse no próximo rival, o Real Betis, e non facer contas nin supostos sobre a clasificación final do equipo: “Céntrome en cada encontro que falta. Son finais e depende de nós afrontalos mellor que o rival”, asegura Gómez quen considera que a vitoria ante o cadro bético pasará por “ter unha vez máis o control do partido, defender a posesión do balón e xogar polas bandas”.
Sergi Gómez asentouse esta tempada no once titular, ofrecendo un gran rendemento acorde á extraordinaria campaña do equipo. Por enriba do individual, o defensor catalán expresa a súa satisfacción polo grupal, subliñando o “paso á fronte a nivel de madurez” respecto ao ano pasado: “Sabemos entender moito mellor os partidos, hai un compromiso defensivo de todos os xogadores… o equipo deu un paso de xigante. Que as ganas de quedar o máis arriba posible non nos descentre”, sinala.
