O Celta pechou o ano sumando un punto no Carlos Tartiere, nun partido espeso e de escaso ritmo, no que volveu destacar pola súa solidez defensiva. Foi o terceiro encontro consecutivo de Liga no que os celestes deixaron a súa portería a cero, competindo nun contexto pouco favorable debido ao cansazo acumulado do último mes e enfrontándose a un Real Oviedo máis insistente, pero sen acerto nos metros finais.
O inicio foi complicado para o Celta, que sufriu sen a pelota e viuse obrigado a replegar en bloque baixo. O conxunto local dominou a posesión e cargou o xogo polas bandas, especialmente con centros laterais, aínda que sen xerar demasiadas ocasións claras. Pola súa banda, os celestes, tiveron a primeira gran opción do partido das botas de Javi Rueda e resistiron con orde ata que o empuxe ovetense foi perdendo intensidade.
Tras o descanso, o guion apenas variou. O Celta apostou polo xogo longo e as transicións, mentres o Oviedo mantivo a iniciativa e a agresividade nos duelos. A pesar diso, as mellores chegadas volveron ser celestes, con varias accións ben defendidas polo gardameta, Aarón Escandell, e un cabezazo a balón parado que se marchou fóra por pouco.
No tramo final, o conxunto de Claudio Giráldez deu un paso á fronte. Con Iago Aspas asumindo o control do xogo, chegaron os mellores minutos e un par de contragolpes que puideron desnivelar o marcador pero, finalmente, non houbo acerto. Desta maneira, o Celta pecha o ano encadeando cinco partidos puntuando a domicilio e cunha bagaxe de 23 puntos que o sitúan na 7º posición da táboa.
O equipo descansará a próxima semana para volver con máis forza no primeiro partido do 2026 que se disputará en Abanca Balaídos o sábado, 3 de xaneiro ás 14:00 horas, ante o Valencia CF.
FICHA TÉCNICA:
0 – Real Oviedo: Aarón Escandell; Lucas Ahijado, David Costas, Eric Bailly, Alhassane; Kwasi Sibo, Colombatto; Josip Brekalo (Hassan, min. 70), Reina (Santi Cazorla, min. 81), Ilyas Chaira (Rondón, min. 81); Fede Viñas (Ilic, min. 85).
0 – Celta: Radu; Marcos Alonso, Carl Starfelt, Manu Fernández (Javi Rodríguez, min. 75); Javi Rueda, Miguel Román, Fran Beltrán (Ilaix Moriba, min. 62), Sergio Carreira; Bryan Zaragoza (Iago Aspas, min. 62), Ferran Jutglá (Hugo Álvarez, min. 82), Williot Swedberg (Jones El-Abdellaoui, min. 75).
Árbitro: Alejandro José Hernández (Comité Canario). Por parte do Celta, Manu Fernández recibiu tarxeta amarela. Mentres que, por parte do Real Oviedo os amoestados foron Colombatto e Ahijado.
Incidencias: Último encontro do ano 2025 correspondente á xornada 17 de LaLiga EA Sports disputado no Estadio Carlos Tartiere ante 23.613 espectadores.
